პრეზიდენტის სასახლის რეაბილიტაციის ხარჯი შესაძლოა გაიზარდოს

Construction News

სახელმწიფო დაცვის სპეციალური სამსახურის ხელმძღვანელის, ანზორ ჩუბინიძის ინფორმაციით, ათონელის ქუჩაზე მდებარე საპრეზიდენტო რეზიდენციის სარემონტო სამუშაოებისთვის 2.5-მილიონი ლარია გაწერილი, თუმცა ხარჯები, შესაძლოა, კიდევ გაიზარდოს.

„ჯერჯერობით ჩამოყალიბებული არ არის, თუ რა დაჯდება მთლიანად რემონტი. დასრულდა გარკვეული ნაწილი, ხოლო გარკვეული ნაწილი კიდევ შესასრულებელია და დათვლის რეჟიმშია. ამაზე სრული პასუხის მოწოდება ერთი თვის ვადაში იქნება შესაძლებელი. 2-მილიონ ნახევარია გაწერილი ხარჯი, თუმცა ეს დასრულებისთვის საკმარისი არ იქნება. ალბათ, მინიმალური ნაწილი კიდევ დაემატება“, – აცხადებს ანზორ ჩუბინიძე.

კითხვაზე, რა ოდენობით მცირდება საბიუჯეტო თანხები პრეზიდენტის ადმინისტრაციის ავლაბრის სასახლიდან ათონელზე მდებარე რეზიდენციაში გადასვლის შედეგად, ჩუბინიძემ განმარტა, რომ ამაზე პასუხის გაცემა გარკვეული დროის შემდეგ იქნება შესაძლებელი, როცა ათონელზე მდებარე შენობის შენახვის ხარჯი გამოჩნდება.

“პასუხის გაცემა შესაძლებელია, თუ რა ჯდებოდა ავლაბრის რეზიდენციის შენახვა. ის თუ რა დაჯდება ათონელის რეზიდენცია, ამაზე პასუხის გაცემას დასჭირდება დრო“, – აცხადებს სახელმწიფო დაცვის სპეციალური სამსახურის უფროსი.

interpressnews.ge

მსგავსი სტატიები