ბათუმის “ოცნების ქალაქში” შესახლებულ ოჯახებს ხელისუფლება საცხოვრებელ კორპუსებს აუშენებს

ბათუმში, ე.წ. ოცნების ქალაქში კორპუსები აშენდება, – ამის შესახებ აჭარის მთავრობის თავმჯდომარემ, თორნიკე რიჟვაძეს საგანგებო ბრიფინგზე განაცხადა.

ე.წ. ოცნების ქალაქში საცხოვრებელი კორპუსების მშენებლობა საბიუჯეტო სახსრებით მოხდება. პირველი ფაზის სამუშაოებისთვის 10 მილიონი ლარია გათვალისწინებული. აჭარის მთავრობის თავმჯდომარის განმარტებით, თანხები გამოიყოფა ადგილობრივი ბიუჯეტიდან და ასევე დახმარებას ელოდებიან ცენტრალური ხელისუფლებიდანაც.

თორნიკე რიჟვაძის განცხადებით, ოჯახების საკითხს ინდივიდუალურად შეისწავლიან.

”ბინების აშენება და გადაცემა განხორციელდება ეტაპობრივად, ფაზების მიხედვით. პარალელურად სამუშაო ჯგუფი უწყვეტ რეჟიმში იმუშავებს და მოხდება ყველა საკითხის ინდივიდუალური შესწავლა, გადაწყვეტილებები მიიღება სამართლიანობის პრინციპების სრული დაცვით. არავის დარჩება უსამართლობის განცდა. მჯერა, რომ სახელმწიფოს ჩართულობით და თითოეული თქვენგანის თანადგომით, „ოცნების ქალაქს“ ახალ სიცოცხლეს შევძენთ. პროცესში ჩართული იქნება არასამთავრობო სექტორიც. უყურადღებოდ არ დავტოვებთ იმ ადამიანებს, რომლებიც წლების განმავლობაში ცხოვრობენ სხვადასხვა სახელწიფო ფართებში.  დღესვე „ოცნების ქალაქში“ დაიწყება მიწის სამუშაოები. ფინანსთა და ეკონომიკის მინისტრს დაევალება პროექტის მომზადება”,  – განაცხადა ბრიფინგზე თორნიკე რიჟვაძემ.

ცნობისთვის, ყოფილი 25-ე და 53-ე სამხედრო ბატალიონის ტერიტორიაზე, აჭარის მაღალმთიანეთიდან ოჯახებმა ჩასახლება 2012 წელს საპარლამენტო არჩევნების შემდეგ დაიწყეს. მოქალაქეებმა ჯერ ხის სახლები ააშენეს, შემდეგ კი ხის ფიცრულების გვერდით ქვის ნაგებობებიც გაჩნდა. დასახლებას “ოცნების ქალაქი” დაარქვეს. წლების განმავლობაში ჩასახლებულთა რიცხვი ნელ-ნელა იზრდებოდა. ეკომიგრანტების პარალელურად ე.წ ‘’ოცნების ქალაქში’’ ისეთი ოჯახებიც გამოჩნდნენ, რომლებსაც საცხოვრებელი სახლის პრობლემა ჰქონდათ. მათ შორის იყვნენ ე.წ. „გასაყოფი ოჯახები”, ასევე მარტოხელა დედები.

ajaratv.ge

მსგავსი სტატიები